Untitled Document

2月16日, 這是整個旅程中最辛苦最緊密o既一次飛行, 2月15日晚八點由艾加拉法第起飛, 16日o既零晨12點幾到布誼諾斯艾利斯, 朝早八點幾會由另一個機場飛去秘魯o既利馬, 時間緊逼, 我地立刻飛的士返上次住o個間酒店, 去到, check-in, 拿拿淋沖埋個涼己經差不多一點, 我地求其咁訓o左四粒鐘, 五點幾就又再動身去機場. 我地同埋個的士司機都覺得我地係internation flight,應該都係去個international airport, 但係去到check in 至知原來零零舍舍我地坐o個班機係o係本土航班機場起飛, 好在仲有時間, 於是我地再飛的去我地要去o既機場. 中途我地發現我地個的士佬出蠱惑, 個咪錶會o係我地唔留意o既時候一次跳幾下, 有一兩次我特登扮望第二度, 結果真係俾我莊到佢出術,本來我好想揭發佢, 同佢埋論, 抄低佢車牌睇下去邊度投訴佢, 不過唸我地冇咁o既時間, 亦冇乜機會返o黎, 所以我最後都冇咁做.
趕死趕命咁check-in, 上機, 去到利馬, 得番個零鐘頭俾我地轉機去庫斯科, 冇乜時間四圍逛, 不過其實利馬個機場都未起好哂, 死城一個, 都冇乜好行. 機場都未起好就開, 我都真係服得秘魯政府好緊要.其實由利馬去庫斯科大約一個鐘頭就到, 但我地買錯o左機票, 坐o左架要轉機o既, 結果就飛o左三個鐘. 好在秘魯同阿根廷有2個鐘頭時差, 幫補番少少, 多番兩粒鐘玩. 不過雖然多o左兩個鐘, 但去到庫斯科都己經係下午四點幾五點. 我非常擔心買唔到第二日去馬丘比丘(machu picchu)o既火車票, 因為聽講即日買經常買唔到, 而我19號己經要返香港, 只得17同埋18號可以去馬丘比丘, 如果17號真係買唔到票去唔到, 18號可能就會只係得番半日,因為坐火車都要幾個鐘, 所以明知俾agent食commission都幫佢地買o左兩張飛, 叫做放下心頭大石.
攪掂所有野之後, 我地就去o左一間當地o既中國餐館食飯. 味道都幾中國北方口味, 唔似得美國某d遊客區o既中國餐, 完全係為o左吸引外國人, 其實都唔中國菜. 不過阿邦就好似唔係好鐘意呢間野, 話佢碗湯同碟差唔多價錢, 好貴咁話喎. 講開又講, 去中國餐館食野, 魯秘人有個專用詞叫"chi fan", 同普通話o既"吃飯"差唔多音, 好可能都係o黎都未定. 食完飯拎埋火車票之後, 就百無聊賴咁閒逛. cuzco海拔3400, 加上我地係坐飛機o黎, 海拔一下子由零升到3千幾, 我地都好驚會有高山反應, 所以我地兩個o既步伐都唔敢太快. cuzco 係以前印加帝國o既首都, 相比起之前我地經過o既城市, 果然係古舊好多.

2月18日原本定o左今日朝早再上馬丘比丘, 但因為仍然落雨, 上到去結果會同尋日一樣, 加上入場費, 車費加得太離譜, 實在唔值得再上. 所以就留o係小鎮逛街買手信. 食完午餐, 返酒店check-out完就坐火車返cuzco. 去完馬丘比丘之後, 基本上我計劃o左要去o既地方己經去哂, 趕死趕命咁玩o左17日, 到呢一刻有一種終於可以休息下o既感覺. 第二朝食完早, 本來都百無聊賴, 不過經過一d travel agent游說之下, 買o左張套票去cuzco o既16個印加遺跡景點, 20蚊美金(我o個張4個景點, 10蚊), 我地o係兩間唔同o既travel agent 見到, 舊年只係10蚊美金, 前年5蚊, 又係每年加一倍..唉.. 令我對秘魯o既印象大打折扣..都係o個句啦, 要去趁早, 唔係過多幾年都唔知會變成點.

拿拿聲包o左部的士, 用兩個鐘頭遊o左四個最主要o既景點. 時間差唔多, 就揹起重o左一倍有多o既行李, 坐30個鐘頭飛機返香港. cuzco -> 利馬 -> 邁阿密 -> los angeles -> 東京 -> 香港.
今次非常順利, 每程駁機都只係等兩三個鐘, 基本上都冇時間行, 一落機就要趕住去轉機. 連續坐成三十個鐘, 最然有少少時間行下, 但都坐到背脊有d痛.

2月17日, 又係例牌六點零起身走人, 坐火車去馬丘比丘. 呢條航線o既火車好特別, 途中經過一d 高山o既時候, 會"之"字行駛. 火車開行冇耐, 就停低落o黎, 跟住又冇耐, 部火車好似返轉頭, 不過再行多幾秒你就會發覺原來架火車並唔係返回頭路, 而係掉轉頭上緊斜. 火車一路行一邊會見到cuzco市中心, 農田, 河流, 急流, 而另一邊長期都係山邊, 如果買飛買錯邊, o個五個鐘頭火車都係對住山崖都幾悶. 火車中途會有兩三個站. 停站時會有人向你兜售記代品, 仲有熱辣辣粟米賣, 當日我地正所謂飢寒交逼, 當然要一人買一枝粟米醫醫個肚啦. 粟米之中, 秘魯o既粟米都可謂最好食啦. 唔單止好味同夠勒, 仲粒粒大過其他成個碼, 十足十一隻大牙咁大.

四個幾鐘頭之後去到馬丘比丘山下一個小鎮, 一落火車己經一大堆旅館o既人走埋o黎招呼你, 十足十新樓盤開售, sales 搵你睇樓一樣. 阿邦話想住一間近河邊o既旅館, 而我自己就冇乜所謂, 於是我就任由佢決定住邊間. 佢揀o左間都幾近河邊又非常平o既旅館, 但係就要上條長命斜, 呢度海拔又高, 又揹住重到死o既行李, 我幾驚行到半路頂住唔住呀, 好在都無驚無險安全到步. 放低行李之後, 即刻落返去買車票上馬丘比丘. 我地完全唔知馬丘比丘有幾大, 要行幾耐至行哂, 而我第二日就要返cuzco, 所以最保險都係今日先上去行一行. 萬一今日行唔哂, 仲有第二日可以再去過.
呢次可謂我地去咁多景點以o黎最唔好彩o既一次, 買車票排排下隊就落起雨o黎, 仲好似越落落大, 但少少雨點影響唔到我地上去馬丘比丘o既決心. 去到入口, 例牌又要買入場卷. 一望價錢, 即刻打個突. 要成40蚊美金. 上網睇人地早兩年o既遊記都係20蚊美金. 原來今年先至加價, 仲要一加就加一倍, 順便要提一提我地坐o黎o既火車又係今年加o左價, 由35美金加到65美金, 上馬丘比丘o既小巴, 又由5蚊加到10蚊, 真係同搶冇分別. 我睇其他人早兩年o既遊記, 都係話秘魯價廉物美, 但係d 同旅遊有關o既野就年年加一倍, 到而家己經唔係價廉, 而係貴到飛起. 所以奉勸各位想去秘魯, 特別係馬丘比丘o既人, 最好就早d去啦, 睇怕出年又加一倍.

到馬丘比丘入口, 雨仲未收, 唔夠幾分鐘我地張地圖己經俾雨水浸爛o左. 唯有拎住張爛熔熔o既地圖, 估估下咁行. 不過其實行馬丘比丘都唔會迷路, 冇o左地圖其實都只係未必可以用最快方法去到想去o既地方o者. 行o左十幾分鐘, 兜兜轉轉o左幾次, 去到一個山領, 忽然間眼前一亮... 嘩. 一大個印加帝國遺跡出現眼前. 不過個一部份俾前面o既梯田遮住o左, 所以我地都冇留低, 繼續向上走, 上去遺跡o既最高點. o黎到呢個高度, 我地其實己經身處雲入面. 上到最高點時, 整個馬丘比丘都己經俾雲完全籠罩住. 雖然肉眼仲可以隱約見到遺跡, 但相機同dv就一定乜到影唔到, 於是我地o係間茅屋一邊避雨, 一邊等d 雲散.
茅屋入面仲有幾班旅客, 我見佢地個都好似好失望咁. 似乎係因為落雨, 個景唔夠靚啦. 我同阿邦久唔久就冒雨走出去睇下d 雲散未, 結果冇耐之後終於都俾我地等到. 我地抹乾鏡頭, 沖出去影低兩三幅相就走返入茅屋避雨. 抹乾鏡頭之後又再沖出去影過, 如是者兩三次之後, 雨開始細, 我地直頭留係外面慢慢影, 茅屋入面o既其他人見我地咁勇, 知道機不可失, 都走出o黎影埋一份. 隔得一陣, 雨開始停, 我地都影夠離開山頂, 直接走入遺跡.

其實我地對呢個印加o既古城都冇乜認識, 手頭上亦冇書介紹入面o既邊處係d乜野, 有d乜用途. 我地只係由我地o個張爛熔熔o既地圖得知有幾個乜乜神廟咁上下. 久唔久會見到有導遊, 帶住一團團人, 對住某d 野o係度講解一番, 有時都會偷聽到一部份. 不過都係唔詳細. 我同阿邦始終對影相o既興趣大過考古, 所以都係四圍去取景. 見靚或者特別o既就影低佢, 心唸或者第日會係某本書上知道番呢舊係d乜野都未定, 但或者其實都係純綷係為o左靚同埋特別而影o者.

o係馬丘比丘最開心都係同d 駝羊玩. 佢地個樣就傻傻下, 但性格就好高竇, 鐘意靜靜地食草. 你行埋去佢唔會點理你, 你同佢玩或者喂佢, 佢會嫌你煩走開唔理你. 如果你係佢地身邊講多幾句野, 佢聽到又嫌你阻住佢, 佢又會走開. 總之佢就係好cool, 同埋食唔停啦. 不過雖然佢地唔係和謁可親, 但見到佢地你又會唔捨得唔同佢地玩, 唔同佢地合照. 一路一路下o既時候, 久唔久會見到d 不知名o既小動物. 當四遊圍o既遊客己經散得七七八八, 一個高山之山, 雲霧入面, 一堆人係古人遺留落o黎不可思議o既建築. 周圍都空蕩蕩o既感覺, 加埋o個種騰雲駕霧o既感覺, 再加埋d奇奇怪怪動物, 真係好似身處天空之城 LAPUTA, 好正!

我地行到最後坐最後一班車五點半開o既車落山. 半路中途有一班小朋友走出o黎同我地架車打招呼, 根住就會表演快過我地o架車跑落山. 我地架車一駛過, 佢就會跳入一條捷徑, 我地o架車之字型咁行o左兩三個彎位之後, 又會再見到同一個男仔係我地前面, 一路揮手, 一路大叫"amigo". 等我地架車一駛過, 佢又忽然唔見人, 兩三個彎之後, 我地又會再一次見佢出現. 其實我同阿邦未o黎馬丘比丘之前, 都己經睇過其他人o既遊記, 知道會有細路表演呢樣野o黎搵錢, 所以我上山o個陣己經留意, 而且發現o左每幾個彎位就有條石梯, 我唸就係個男仔用o既捷徑. 我同阿邦落山o個陣, 一開車己經o係度等個細路o既出現, 但其他遊客就好似好驚奇, 車上面充滿o左笑聲. 最後個男仔都上埋車, 車上面o既人都紛紛俾錢佢. 阿邦話如果佢唔係著波鞋, 我就俾多一蚊美金佢, 我話如果佢冇著鞋, 我就俾5蚊美金!

o個晚我地去o左當地o既溫泉. 睇書o既介紹同埋d遊記, 都話值得一去. 我地橫掂有時間, 當然係去試下啦. 點知試完至知中招. 天寒地凍, 但個溫泉d水就一d 都唔熱, 一路浸溫泉, 一路覺得凍, 我地心知不妙, 如果唔快d走, 冷傷風都有份. 但又唔甘心俾o左錢5分鐘都唔夠就走, 好在後來發現原來個池o既角位, 大約有一兩個人o既空間d水係夠熱o既. 我地捱多十分鐘就返酒店訓.