貅之旅遊世界

2005年二月三日, 一個令人興奮莫名o既旅程終於開始啦. 阿邦約我7點半到機場, 點知佢自己竟然遲o左足足半個鐘頭. 不過見佢係因為唔記得帶樣好重要o既野返轉頭而遲到, 所以都勉為其難咁原諒佢啦. 今次最初預算o既目的地係巴西o既里約熱奈盧, 時間同地點, 完全係為o左配合一年一度係里約熱奈盧(簡稱RIO)o既嘉年華. 呢個嘉年華可以話係舉世觸目, 有幸可以親歷其境, 梗係幾大都就埋佢啦.
由於香港去巴西冇直航機, 而去南美洲o既機票又勁貴, 為o左節省旅費, 我地揀o左一個比較轉折o既方案, 由香港先到東京, 再飛美國紐約, 再往邁阿美, 最後到RIO. 全程30個鐘頭, 真係聽到都有少少心寒.
第一站係東京, 本來冇唸過o係東京出境, 但係因為有成5個鐘頭駁機時間, 留係禁區會好悶, 所以我地都係決定出境, o係機場搵間食店歎下刺身同埋壽司先. 我地臨出immigration 之前, 係張出境form拿拿聲求其寫間酒店名, 唸住大無斯樣咁出去啦, 好衰唔衰我先前o係張出境form度寫o左我只係transit同埋留5個鐘, 個入境處職員發現就問長問短, 因為由機場出東京市區都差唔多兩個鐘, 一來一回都四個鐘啦, 我得o左5個鐘去間酒店做乜野呢. 好在我每年都去兩三次日本, 我唸佢見我咁多入境記錄, 只係問o左幾句就放我走啦. 真係俾佢嚇餐死.
我地搵到一間叫築地-壽司岩, 一個set lunch都係2千1yen, 成十幾舊壽司, 機場o黎計都算幾抵o架啦. 我同阿邦一人叫o左一個set lunch, 之後我就拎我地本旅行必備--<<hola 南美>>出o黎, 研究一下我地o既行程. 阿邦見到做樓面o個位嬏嬏對我地本書好似好興趣, 於是乎就同阿嬏傾起上o黎, 原來阿嬏十幾年都o黎過香港, 講起香港佢到而家都仲係好開心. 我地傾傾下, 店入面o既其他伙記都對我地好有興趣, 久唔久都o黎搭下嘴. 除o左阿嬏, 其他都唔識英文, 咁阿嬏就同佢地翻譯, 而我就同阿邦翻譯, 雖然只係用d單字, 但都叫做溝通到. 店入面其中一個女仔, 都幾靚女下, 原來仲係讀緊書, o係大學讀緊日本文學, 我同阿邦當堂嘩一聲, 日本文學喎...不期然都對佢有d敬佩. 本來好沉悶o既一個午餐, 但因為同d 伙記偈得開心, 令我地都感染到d歡樂氣氛, 而且亦幫我地打發唔少時間.
食完壽司, 繼續我地去南美o既旅程, 接住落o黎係由東京飛往紐約, 足足12個半鐘頭, 要特別一提呢一程o既空姐, 成班機o既空姐都係一d 40幾歲o既阿嬏, 同埋一個典型o既美國大肥婆. 我提佢地並唔係人生攻擊, 只係我都係做airline o既, 係我心目中, 空姐就算唔係好靚, 都應該會係好專業o既模樣. 我好驚訝呢間航空公司o既空姐會係咁"街坊". 有一次個肥婆o係我身邊經過,
起初我仲以為係乘客, 後來唸唸下好似唔對路, 再望多幾眼至發現原來佢係空姐. 心底裏當堂出現一個大問號, 乜個空姐咁唔似空姐o既.

好唔容易咁捱過12個半鐘頭, 到紐約機場己經係黃昏, 雖然話就話轉機, 但係因為前前後後幾日去美國o既機都爆哂, 由美國去巴西o既機亦都爆滿, 所以唯一o既辦法就係我地係紐約停兩日, 至再飛過去巴西. 我地到步後唸住搵機場o既agent幫我地搵酒店, 點知呢個機場竟然係一間agent 都冇, 有o既只係幾個直接駁去agent o既電話, 而且佢地介紹o既都係一勁貴o既星級酒店. 同我地心目中o既價錢相差好遠。
最後我地搵o左機場唯一一間攪機場接送o既agent, 佢幫我地搵到一兩間都幾ok o既Hotel, 係曼克頓區. 我地住o個間Hotel 叫 super 8, 係曼克頓區中心地帶, 都算唔錯, 又唔算貴. 我地放低我地行李, 就出街搵食.聽過紐約o既夜晚好得人驚, 所有o既旅遊書都提醒我地入黑之後千祈唔好搭地鐵.
我地求其食o左d 野, 見四週圍行都五光十色, 心唸應該都冇問題就開始四圍咁行, 行o左一陣,見夜啦,又凍, 就返酒店訓。

2月5日, 呢一日我地會一整日留係New York, 我地兩個都係第一次o黎New York, 當然要去探一探自由神像啦. 我地行行下, 忽然間落起雪上o黎. 繼續行下行下, 發現差帝國大廈就係附近, 見橫掂順路, 就順便上一上帝國大廈, 點知因為落雪o既關係, 頂層o既能見度等於零, 所以最後我地都冇俾到錢上去.
相對於四圍都係摩天大廈o既紐約, 自由神像顯得非常矮細. 而且自由神像係位於一個都幾遠o既小島上(為o左方便, 我叫佢做「自由島」), 望上去就更加細隻. 為o左影相出o黎個像唔係細粒, 雖然要俾錢, 都要上一上「自由島」。
要上去自由神像都幾麻煩, 美國自從九一一事件之後, 多o左好多保安檢查, 我上一自由神像就要check成三次. 搜你幾勻, 但其實都只係俾你去到自神像隻腳下面. 自從九一一之後, 因為保安理由, 都己經唔俾人上神像個頭, 俾你去到隻腳, 己經係皇恩浩蕩.
我地兩個其實對紐約真係興趣不大, 所以去完自由神像, 都己經冇乜地方想去. 到o左食飯時間就想去china town食番碟燒味飯, 因為都會有好耐食唔到中國菜啦. 起初我主覯地覺得, 全世界o既china town都係得一兩條街仔, 冇乜好去. 但係o黎到約紐china town就知到係我唔o岩, 我唔應該一竹篙打一船人。紐約o既china town大到我地行到腳仔軟, 但仲未見到盡頭, 雖然只係紐約其中一小部份, 但己經比起好多其他所謂o既城市大. 呢度茶樓多到我覺得有少少離譜, 可以一條街十間八間, 甚到連續三間鋪位都係茶樓都得o既. 不過我地目的係想食叉大雞飯, 唔想去茶樓, 所以搵o左間類似港式茶餐廳o既食店, 就食我地o既叉雞飯, 叉鴨飯, 味道都真係唔錯, 比起香港一d差勁o既茶餐廳仲要好好多. 我地食完飯, o係china town迷路一輪之後, 就要決定下一個景點. 阿邦其實好想去Modern Art Museum, 但係因為之前Modern Art Museum裝修, 我地唔知佢開返未, 所以我地揀o左去National History Museum. 紐約呢個Museum同倫敦o個個差唔多, 都係有好多恐龍, 其中最有睇頭o既就係全球最高o既恐龍化石.
返到酒店, 撻落張床之後, 我地兩個都唔係好想再起身, 最後都係我走o左落樓下, 去Burger King 買o左兩個餐, 返上房食完就訓.

2月6日, 今日終於要離開紐約飛往巴西,中午時分至飛, 所以我地趁臨走前仲有少少時間去o左紐約中央公園. 呢個公園十分出名, 好多荷里活o既電影都係度取景. 星期日一大清早o既中央公園實在好舒服, 有好多人帶佢地o既愛犬出o黎散步, 我地又見到好多人跑步, 溜冰, 冰上曲棍球, 加埋清晨o既陽光, 簡直係冇得頂. 不過我地要趕住搭飛機, 所以只好行一陣就走. 再一次踏足美國o既機場, 又要再一次問長問短, 左抄右抄. 美國出入境認真麻煩, 我地飛o左5個鐘頭去邁阿密, 再飛多八個鐘頭, 計埋等計埋時差, 去到 RIO o岩o岩好晨早6點幾.