moreno 冰川
2月13日, 六點幾鐘起身, 預備o左幾隻熱狗, 到7點15分, 外表有d 好似碧咸o既Tour Guild己經駛住部四驅車係民宿門口等我地.
雖然身處南美, 但去Moreno一路上o既風景同美國o既阿里桑拿州冇乜分別. 路途上久唔久會有d 野兔走出o黎, 同我地部車鬥快. 碧咸哥哥每次都會特登駛慢少少,
等佢地以為自己同我地差唔多快. 到佢地累o既時候就會自己走返入草叢. 大約個半鐘頭之後, 我地就到o左去冰川o既碼頭. 開頭都以為成個Tour會有五至六個人,
點知計埋我地都只係得三個人, 碧咸哥哥同我地介紹最後一個團友, 佢係一個義大利律師, 同埋另外兩個帶我地行冰川o既導遊. 我地上o左架船話都冇咁快就去到對岸,
預備上冰川. o個度有個茶水站, 亦係d 導遊住o既地方, 兩個導遊同我地講明行程, 就話今日好多野攪, 叫我地一路上唔好掛住影相, 拿拿聲去完廁所就出發.
出發冇耐, 其中一個導遊走埋o黎話幫我拍dv, 等我同阿邦都上到鏡. 我當然樂意咁做啦. 話時話個導遊真係幾professional,
專係快我地半條街, o係d 角位一路追住我地, 由前到後影低我地穿過叢林o既情況. 不過就有d 擔心d帶唔多佢玩. 揹住重到死o既行李, 又鼻塞,
一路上都跟得好辛苦. 其他人就行得鬼咁快, 仲快過我平時行平路, 真係好似好趕咁. 廿分鐘後, 我地到o左個中途站. 呢度放o左好多對行冰川專用o既釘架,
我叫佢做"鐵爪". 而呢度亦係一個比較 "大眾化" d o既行冰川團o既起點. 導遊要我地o係度揀o岩一對自己size
o既鐵爪, 帶埋佢行多兩分鐘路, 去到一個更加深入o既地帶, 至行上冰川. 而o個度就係我地要去o既BIG ICE. 而我因為病到瘟瘟燉燉, 又行到死下死下,
對於導遊講o既野, 好多時都只係聽到一半, 結果冇帶到對鐵爪就混混噩噩咁跟o左佢地上山. 行o左冇耐, 導遊話帶我地行條冰隧道, 佢地檢查完一輪之後,
就話我地好好彩, 因為唔係成日都咁好Condition 可以入去條隧道. 而且我地係佢地第一班客仔佢地帶入去條隧道. 條隧道係因為冰川移動, 同山o既側邊唔夾而形成.
入到去陽光透過冰射入o黎, 令到成條隧道到冰藍色. 由於d 沙泥都俾冰川行過, 所以都好鬆, 我地行o既時候都要特別小心.
之後我地繼續上路, 又再廿分鐘之後, 導遊叫我地拎對鐵爪出o黎, 因為要開始上冰川. 呢個時候, 我至如夢初醒,
"o下, 乜要帶埋對野出o黎咩? 導遊由頭到尾到係幫我試過一隻, 冇人同我講過要帶喎." 正在唔知點算之際, 其中一個導遊o係某舊石頭後面拎o左兩對鐵爪出o黎,
應該係佢地收埋o係度, 以預不時之需. 好在其中一對o岩size, 咁我地就開始正式行上去Moreno 冰川啦.
開始之前, 導遊教我地行冰川o既最基本幾個枝巧. 上斜就 \ / 字腳, 無論四十度定六十度斜, 都一樣上得到.
落斜11字腳, 導遊示範差不多90度斜都落到. 橫過斜面用丁字腳打橫行.
我地每人試o左一次, 大家都成功之後, 就向住big ice 出發. 導過話俾我地聽我地行己經o左差唔一個鐘山路, o黎到一個比較入o既地方, 而家就會向住冰川o既中間部份走o過去.
一來一回, 我地大約會o係冰川上行三個鐘. 因為我地比平時早到o左半個鐘, 又行得比以前d 人快, 所以導遊話如果我地行快d, 就可以行多d 地方,
玩多d 野. 跟住二話不說就開始行. o係冰上面行, 覺得對boot 特別梗腳. 平地都還好d , 一到斜路, 就要下下用力鋤落去d 冰. D 冰又硬,
其實都幾用力. 一到落斜仲衰. 因為對腳同對boot 有少少虛位, 所以一到落斜, 同橫過山脊時, 對腳係對boot 入面係咁上下上下咁卒. 就係因為咁行,
唔夠半個鐘腳板底就開始痛.
一路上我己經冇乜停落o黎影相o架啦, 但係都仲係跟唔到佢地幾個o既步伐. 我本身己經係慣o左慢慢行,
加埋仲病緊, 又鼻塞, 呼吸困難又再辛苦d, 再加埋腳底痛. 當然係比佢地慢啦. 久唔久導遊見到d 野, 會停低講解一下呢d 咁o既特別現象係點形成.
例如, 久唔久我地會見到一d 好深o既 垂直o既洞, 根據佢地講, 冰川上面有d 地方會有泥沙, 而沙吸收太陽光比冰快(因為冰會反射陽光), 沙又傳熱俾佢下面d
冰, 所以佢下面久而久之就會有個洞, 一開始有洞, 陽光就會射入個洞, 就算反射都一樣係射返入洞, 加上冰一開始溶成水, 就會更易吸收陽光, 再溶埋d
水下面o既冰, 個洞就會一直向下伸延, 所以有時我地見到d 洞, 雖然洞口好細, 但係就深不見底. 好在導遊久唔久都有d 野講, 我至有少少喘息o既機會,
可以追返上o黎. 行行下, 我地係冰川上面有條小河, 根住個導遊同我地講, 唔單止有河, 仲有湖添. 根住個導遊仲話, 唔係個個都搵到個湖o架. 另一個導遊就即刻叻唔切,
"無錯, 不過我搵到". 導遊係冰川上面行一定要跟住佢地, 因為有好多地方唔係咁實淨, 塴o左跌落去就好大件事. 所以雖然跟得好辛苦,
我都忍住痛死跟. 不過始終都仲係跟唔上, 要佢地久唔久等我. 冇幾耐之後導遊帶我地去到等二條河, 起初只係一條細水流, 後來水流越o黎越多, 我地跟住條河,
終於俾我地搵到個湖. 個湖d 水藍得好神奇. 好似李斯得林一樣. 不過導遊話呢度冇污染, d 水係可以飲o既, 仲即場示範飲同埋裝水. 兩個導遊話呢個湖d
水得4 度, 仲發起神經上o黎. 一人除一隻手錶浸落水, 話要度下d 水o既溫度. 跟住我地就係呢個湖o既旁邊開餐, 求其食o左兩隻自己整o既熱狗.
飲o左d 水導遊又話要走, 我連鞋帶有少少鬆都o黎唔切再綁過就要走啦. 導遊又一次摧促我地, 話我地行得快d, 就可以玩多d 乜乜乜乜. 睇o黎佢地仲想玩過我地.
休息完一輪再行過之後, 對腳比起之前更加痛, 不過好在我己經知自己邊度最痛, 避重就輕, 好叫做好d. 雖然上斜落斜冇咁痛, 但係我依然係比其他人成條街.
行得一陣, 我己經被遠遠拋離, 其中一個導遊見我咁慢, 就走埋o黎'照顧'我, 帶我行捷徑追返其他人. 佢見我咁弱, 就問我係咪平時食煙, 定係冇乜做開運動呀.
我都唔駛點解釋, 講兩句佢聽, 就知道我係病到冇力. 皆因我把聲己經咳到沙哂, 連我自己都唔認得自己把聲.
繼續我地o既行程, 大冰洞之後其實己經差唔多返到起點, 我地返到原來地方, 我俾番對鐵爪導遊, 又再行幾十分鐘山路返碼頭.
可能因為係下山, 今次大家都行得快o左, 不過好在我都跟得到. 返到碼頭, 我忽然發現我唔見o左對手套, 因為對手套係租返o黎, 所以我一定要搵返.
我記得直至到我地放低對鐵爪, 我都仲拎住我對手套, 所以應該唔見o左冇耐. 於是我孤身返轉頭, 行返去我地放鐵爪o既地方. 因為唔駛再拎相機dv同水,
個什輕鬆好多, 行都行得快d. 原本去o既時候要十分鐘, 今次五六分鐘己經到. 好在手套真係漏o左係呢度, 我拎返對手套, 就即刻趕返碼頭. 船一早己經o係度等我,
我上埋船, 大家就回程啦. 落船之後, 碧咸哥哥己經等緊我地, 返到calafate, 己經係七點幾八點. 我地返到民宿, 沖完涼換完衫, 成個人好似散哂一樣.
差唔多連拎對鞋去還o既力都冇. 原本行五分鐘o既路, 足足行o左十幾分鐘至到. 我去還鞋, 阿邦就去報第二日o既團, 之後一齊同埋兩個導遊, 同埋義大利團友食飯.
食完返到民宿己經十一點幾, 攤上床就好似死屍一樣咁訓著啦.
moreno 冰川
去moreno途中亦非常靚
上冰川前要行一大段山路
冰川中的湖
冰隧道
大冰塊跌落水, 濺起o既水花
