呢個都算係我咁多次旅行中, 最離奇o既一個...
出發前大約十日, 我因為踢波拗柴, 足足有四日要留家靜養, 仲要拐杖先行到路. 非常怕去唔成旅行. 但奇蹟地傷勢好得極快. 三四日後己經可以正常地走路, 真係喜出望外. 當然要感謝神啦.
興高采烈地出發, 由於之前抱住一個去遊漡o既心態去, 所以好多野都冇準備, 好似hotel o既confirmation letter, hotel 地址, 地圖.. 到去到日本至發覺乜都冇, 由機場至市中心一段車程都有少少擔心. 好在間酒店都好近車站, 一問就知點去. 而confirmation letter亦係有冇都得. 不過好戲在後頭... 我的行李箱o既鎖竟然冇啦啦壞o左, 鎖住哂我d替換衣服. 我起初以為我一時唔記得改o左個密碼啦, 但試o左幾個都唔成功. 結果我用o左大半個鐘頭, 試哂全部1000個組合, 都冇個o岩. 最後走到樓下問reception 借工具夾硬撓開個鎖..好在個o急又冇事, 又開到. 但己經天黑, 我求其食o左d 食, 行o左一陣, 咁就冇o左一日.
第二日一早就出發去京都, 到酒店放低行李就去寺廟追紅葉. 第一間到o既係"神護寺". 揀佢o既原因係根據網上情報, 其他地方o既葉o岩o岩至開始有紅葉, 而神護寺己經係四圍都好紅.. 果然, d 紅葉非常靚. 但係好唔好彩, o個度係要行一大段路至到神護寺, 計埋影相時行來行去, 我行o左差不多三個鐘頭. 跟住我隻腳開始痛... 可能就係呢段時間, 我又行傷o左我隻腳..真慘~!
本來想去埋另一處網上情報話紅葉開得好勁o既"知恩院", 但因為腳痛, 行得慢, 又要抖, 去到時發覺知恩院原來大得好緊要, 又要收入場費. 以我o個時隻腳o既狀況, 入去行唔得好耐就要返出去抖, 肯定唔抵, 所以我掉頭就走, 但坐車走時, 己經開始黃昏, 原來呢個時候, 京都大約五點幾就開始日落. 咁我影紅葉o既時間又少o左好多啦. 好在冇入知恩院.
第三日我o既第一個目的地係銀閣寺, 但今次好衰唔好衰撘錯車. 正確d o黎講應該話o架車唔照路線o黎行. 好在基本上o架巴士o個方向都正o岩, 只係行o左隔離兩條街, 到我confirm架巴士過o左我要去o既站, 我至落車自己行返轉頭, 到我行去時, 隻腳又開始痛... 真係至衰係架巴士.
哲學之道同就o係銀閣寺隔離, 我行哂兩處都己經係食晏時候. 我一路上買下手信, 點知買得野o黎,隻腳負磅就更加痛. 最後要拐下拐下咁行, 真陰公. 於是又要返去酒店放低d 野, 同埋抖返一陣, 咁一o黎, 又冇乜幾多時間剩. 下午去嵐山, 去完就專登搵o左間野食sabu sabu, 食完返到酒店至發現原來酒店附近都有同一間鋪o既分店...吹脹! 早知就唔駛我用咁多隻腳啦.
第四日依然係百事不順, 而且就係唯一一日落雨. 好在, 係落大兩之前, 我就遊完我要去o既清水寺. 仲有如果唔係因為落雨, 我都唔會冇啦啦買遮. 後o黎我將把長遮俾當做拐杖. 又好在有把長遮當拐杖, 唔係d 路都唔知點行. 我一早出去, 唸住行兩個鐘, 計埋來回車程都係十一點幾就會返到, 點都趕得切十二點前check out. 結果, 一切在予計之中, 我返到酒店只不過係十一點二十分o左右. 我拿拿聲去check out啦, 點知個reception 話我知, 呢度係十點鐘check out, 按規定每遲一個鐘要罰1500yen, 即係差不多一百港元. 我當堂呆一呆. o下, 唔係十點咩?? 佢同我講話張notice 寫到明, 仲拎埋出o黎俾我睇. 我執拾完行李check out時, 見個reception 同個支配人(manager)傾o左幾句, 就同我講話支配人話因為我唔知係十點check out, 又唔係遲好多, 所以今次唔駛收我罰款... 嘩真係心情好番哂. 之後我返返去大阪. 放低行李之後再出去逛街. 我真在累得太利害, 膊頭同埋腳都非常酸痛. 連續幾日每日十個鐘揹住相機四處去, 我o既膊頭一早就痛到唔想再揹任何野. 途中我經過一間大電器店, 我就走o左去健康用品部門, 坐o左佢地部按摩椅, 足足按o左半個鐘至肯走. 按完之後, 即時唔駛拐杖都可以行到. 都咪話唔功效顯著.
第五日去神戶. 原定有兩個目的, 一. 行下北野異人館 (一個區域有好多外國建築物), 二. 食神戶牛柳. 我去到神戶, 行唔夠一陣就開始腳痛, 所以之後我行o左陣東急hands (一間乜都有o既生活百貨), 食完我o既神戶牛, 就去神戶港口等日落, 本來都好好天, 但差唔多到日落時分就開始多雲, 真係俾佢激死.
最後一日, 亦係最順利o既一日, 我o係大阪梅田酒店附近遊漡, 因為冇乜期望, 所以亦都冇乜失望. 隻腳痛就搵地方坐低飲野. 坐夠又再行過. 不過呢個trip 最令我難忘o既係, 我辛辛苦苦影o既相, 清水寺入面影得最靚o個十幾廿幅, 因為張memory card 壞o左而冇o左....令我每次想起, 都想向天大叫...."好慘呀!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!"
不過話分兩頭, 雖然拗柴, 但我依然去到旅行; 雖然腳痛, 但仍然影到靚相, 食到好野; 雖然個鎖壞o左, 但仍然開到行李箱; 雖然遲o左check out, 但唔駛罰錢; 雖然冇o左十幾廿幅相, 但仍然有幾百張冇唔見......... 所以個trip 依然係好開心! ^_^