貅之旅遊世界

玩完快艇上岸之後, 我地就行返國家公園入口, 再坐回程旅遊巴士離開. 我地冇帶任何o既衫替換, 唯有等太陽曬乾, 南美o既太陽果然係名不虛傳, 我地行o左大約半個鐘頭, 我地身上o既衫幾乎都乾哂. 我本來己經係病病地, 加埋今次又濕水又猛曬太陽, 唔病多兩錢重咩. 於是乎由呢一日開始, 我就一路唔停咁咳, 唔停咁流鼻水.

一返到伊瓜蘇港, 我地飯都唔食就先去阿根廷航空公司, 因為如果轉o左大機, 我地可以轉到機, 咁我地就要即刻出機場. 我地認真好彩, 雖然佢地話可能會轉大機o個班機冇轉到, 但唔知點解之後o個班機又冇啦啦有位, 咁我地就即辦手續轉機, 之後我地又係隔離間travel agent順手book埋下一站誼諾斯艾利斯o既酒店, 叫hotel Liberty, 酒店加埋接送都係150pesos, 都算ok啦, 然後我地求其食少少野就返走酒店拎返d 行李出機場.

o黎到伊瓜蘇, 第一個下午又用到盡, 第二日玩完之後又可以即刻走, 班機又夾到天衣無縫, 我地唔駛留多一晚o係伊瓜蘇, 又唔駛浪費一個早上等飛機開, 實在好運到極. 下晝5點幾機, 又坐4個鐘頭到阿根廷首都'布誼諾斯艾利斯'. 因為己經book好哂, 今次o黎到己經有人等緊我地, 於是即刻返酒店. o黎到呢度, 我地己經病得好緊要下. 非常咁累, 所以呢一晚o既節目只係o係酒店附近行o左一陣. 聽講阿根廷食野最出名就係牛扒同埋意大利菜, 而我今晚又狀態不佳, 所以就搵o左間餐廳, 阿邦就鋸扒, 而我就食意大利粉. 果然又真係幾好味, 冇作大. 食完行多一陣, 因為我太累頂唔順, 所以我地就返酒店訓.

2月9日, 7 點就有巴士去伊瓜蘇國家公園, 所以我地又係一早就起身. 一早check-out o左放低行李係hotel就去巴士站搭旅遊巴士入瀑布. o係巴士站o既travel agent 原來除o左巴士入去國家公園, 仲有代理入面o既advanture tour. 我地就揀o左個至多野玩, 會入雨林, 坐艇仔遊伊瓜蘇o既河道, 同埋坐快艇衝入瀑布o既tour. 伊瓜蘇港同國家公園其實都好近, 所以冇耐己經到. 我地先由公園入口坐免費o既火車仔入去, 落車之後大約再行十分鐘, 就到整個伊瓜蘇瀑布最洶湧澎拜o既 "魔鬼喉嚨". 阿根廷政府搭o左條小路同一個台一直伸延出去, 係正瀑布頂, 水勢最利害o既瀑布口旁邊. 全地球最大既瀑布, 就係身邊傾瀉而下, 呢個咁有氣勢o既景, 搵勻成個地球都唔會再有第二處可以搵到. 好在我地係全日第二批到o既遊客, 所以未算係好多人, 有好多時間同空間俾我地影相, 簡直令我地兩個興奮到忘哂形.呢個景係犀利到, 去完魔鬼喉嚨之後, 我同阿邦都完全唔記得o左尋日巴西見過d 乜野景, 尋日有乜野令我地興奮. 我地一齊都有一個結論, 就係如果巴西同埋阿根廷只能揀一處睇, 一定揀阿根廷.

去完魔鬼喉嚨, 我地就行返轉頭去坐艇仔遊伊瓜蘇其中一條河道, 呢程係全程最悶o既一段時間. 如果可以的話, 我會skip o左唔玩呢樣. 扒艇仔扒o左對近半個鐘, 終於落船. 有部吉普車接我地走. 起初我仲以為係我地o個個入雨林o既節目. 點知原來只係純綷接我地出返去tour information度. 不過好在我地入雨林o既集合點就係正隔離, 等o左十幾分鐘就上車入雨林.

呢程雖然比起扒艇仔好少少, 但我其實我覺得呢程都係可以唔參加, 老實講, 我覺得有少少搵笨. 可能因為我地唔可以深入雨林, 只係駛過d 好邊o既地方, 所以唔覺有乜特別. 好唔容易, 又捱過雨林一段, 跟住我地就玩快艇. 其實快艇都有兩隻唔同o既tour, 一隻只係會去幾個較小型o既瀑布底. 但係己經係好激o架啦. 另一個就會去多幾個瀑布, 仲會去埋魔鬼喉嚨下面. 一場o黎到, 梗係玩到最盡, 我地當然係揀玩多d o個隻啦, 好在我地個advanture tour就係玩呢隻.為o左慳少少就冇得玩樣最激o既就唔抵啦. 出發前工作人員每人派幾隻膠袋俾我地裝d 唔濕得水o既野. 好多遊客都有備而戰, 著哂雨褸. 阿邦就直頭除哂上衫, 只係著條褲, 而我因為己經病緊, 所以冇除衫, 不過我件褸係防水o既, 所以都冇有怕. 我一隻手伸入膠袋拎住部相機, 一隻手捉住個膠袋護住, 一陣d水兜頭淋落o黎, 但係又要影相, 又唔可以俾部機濕, 實行要同佢死過.

快艇一開頭衝入一個好細o既瀑布先熱一熱身, 我頂帽己經唔佢沖甩o左, 橫掂都濕開, 都唔爭在, 直頭唔用頂帽. 根住發現原來自己唔記得將條拉鍊拉到盡, d 水由條頸沖入個肚, 結果都係全身濕哂. 我趁架快艇倒返後少少, 水冇咁多o既時候就對住個瀑布影返幾張, 將部相機入返膠袋之後, 又例牌係咁抹鏡頭啦. 冇耐之後又o黎另一道瀑布, 冇耐又一道. 我當然次次都同佢搏鬥一番啦. 最利害當然係最魔鬼喉嚨下面, 雖然我地只係衝入去瀑布o既水花o既地方, 但都唔野小, 水一沖落o黎, 直頭眼都掙唔開, 更加唔駛講話影相啦. 眼耳口鼻全部都入哂水, 直至到我地架快艇離開o左瀑布範圍, 先開到眼同講到野.