14/2/05 經過一整日行冰川的艱苦行程. 雖然訓o左八個鐘頭都唔係好夠. 今日又係晨咁早就出發.在由calafate
去遊冰川o既碼頭都有兩個鐘頭時間, 我當然o係車上面死豬咁大訓特訓.一覺醒o黎, 己經到o左碼頭, 我地拿拿聲上船, 揀個好位. 我地今程會經過四五個冰川,
當中包括整個阿根廷冰川國家公園內最高的 Mayo 同埋 最大的 upsala. 由碼頭至到冰川, 都會有差唔多兩個鐘頭船程. 真開心, 又可以訓多一覺.
其實除o左因為之前一日行冰川辛苦之外,我一路以o黎都係帶病在身, 其實係需要多d休息, 奈何我地每日schedule都非常緊密, 每日都一早起身,
夜一夜至返, 根本就唔夠訓. 能夠o係船上面訓多一覺, 真係非常感動.
由於我地尋日太累, 根本冇時間精神為今日預備午餐, 所以只好o係船上買d乾糧頂檔. 提到乾糧, 不得不提我買o左一包高纖維麥餅, 呢包餅非常襟食, 味道亦唔錯. 每次o係我餓寒交逼之際, 都救我一命. 差不多兩個鐘頭之後, 我地到o左 Mayo. 初時我地都以為呢個冰川係Upsala, 原因係我地book位時, 個agent同我地講個行程係先去Upsala, 再去另外三個冰川, 最後去Mayo. 但實際上我地係調返轉先去Mayo, 最後Upsala. Mayo用眼望上去個規模同Moreno差唔多,實際上差幾多我就唔知啦. 不過就係因為比想像中細, 所以至肯定佢係Mayo而唔係Upsala.
見到冰川, 船上o既乘客, 包括一眾公公婆婆都湧到甲板船頭, 霸個有利位置影相. 我地兩位由老遠專程飛o黎影相o既青年當然都唔客氣. 有位就攝, 有景就影. 遊艇o係冰川前停留幾分鐘之後就開走,乘客亦紛紛返入船艙, 皆因由冰川一路都有d凍都入肉o既風吹過o黎. 遊客除o左影相o個一輪會走出o黎, 基本上都會乖乖地坐o黎船艙. 話都冇咁快就己經至o左兩點幾, 我地又去到另一個景點.
我地落船上去一個小島上面,行過一條約800米o既小徑, 就去到島o既另外一面, 亦係去睇三條規模較細o既冰川o既地方. 同時, 呢個亦係我地放食午餐o既時間.
由於當時天色麻麻, 冇乜陽光, 加上冰川亦係相對地細, 又加埋我本身都仲係好累, 所以都冇乜心機去睇, 去影相, 只係求其影o左幾幅. 我拎出我筒餅乾,
食o左幾塊, 飲o左d 水, 就當係我o既午餐. 一半個鐘之後就返上船繼續旅程.
大半個鐘頭之後, 我地終於o黎到今程最後一站Upsala冰川. 佢o既模規肉眼望上去己經比起Mayo大上好幾倍. 實際上更加唔止. 不過最開頭我會覺得Upsala雖然大,
但因為個型麻麻, 又比較平, 所以最初其實對佢興趣不大. 但係當我地架船逐漸駛近, 竟然有意外o既驚喜. 一舊舊非常大o既浮冰係我地眼前出現. 有d
浮冰比起我地架船仲要大好多. 浮冰係粉藍色, 並唔係一般想像o既雪白色, 或者係為d水含有豐富o既礦物質啦. 我覺得d 浮冰似一舊染o左色o既海綿,多過係一舊浮冰.
由於船係一路郁緊, 所以望落去浮冰o既角度都一路路有唔同, 如果錯過o左最想影低o個一剎那, 舊冰o既形狀就會己經唔係你想影o既樣, 亦冇得返轉頭補飛.
令到本來平平淡淡o既一舊浮冰飄過, 都變成興奮地等候o個一刻o既來臨. 浮冰越o黎越多, 越o黎越大舊, 如果撞上其中一舊, 都幾危險, 於是乎我地架船就避要d
浮冰開始回航. 於是乎咁坐下坐下, 返到calafate, 己經係晚上八點 (當然太陽仍未下山). 我地o係bus terminal買o左第二日去Moreno
o既巴士ticket,返入town 食晚餐, 就返民宿訓. 順帶一提呢餐晚餐係我成個trip 食得最唔開心o既一餐, 原因為間餐廳o既待應服務態度極差,
見我地唔食buffet, 食意粉, 就睇死個地, 問我地係咪要至cheap o個隻汁(粉同汁係分開計錢o既), 又面燶燶咁, 上菜時又大大力. 總之就係衰啦.
奉勸各位如果有幸去calafate, 都千祈咪幫襯佢.
5/2/05 呢日係o係calafate最後一日, 仍然係要一早起身. 7:30 上巴士, 6:30就要起身, 好在之前一日休息夠, 呢日起身簡直毫無難度. 又再坐車到Moreno, 依然係同一條路, 今日天色陰沉, 同第一次o黎Moreno簡直係兩回事. 我地行下行下, 天色就越o黎越差. 到後o黎仲落毛毛雨添. 講講少少題外話. calafate 呢度大約大三四款 tour, 多數都係包來回車程,同埋一程船遊各個冰川, 最多人問津當然係Moreno o既tour啦. 我地尋日參加o既tour就係最好o既例子.
除o左tour, 其實仲有d 巴士去Moreno, 就係我地今日坐呢款. 原來巴士唔止係載你到Moreno, 其實仲可以坐巴士去到Moreno o既碼頭附近買船飛,
比起參加o個d tour平差不多一半. 我地成車人都係以呢個方式遊Moreno. 所以一到賣船飛o既地方, 就成車人一齊落車買飛上船,成車只得我同阿邦唔坐船,
所以只得我地兩個留o係架車. 呢個時候, 雨越落越大. 我地兩個都覺得其他人好慘. 我同阿邦之前己經o黎過Moreno, 所以相對地少d遺憾, 但係佢地老遠o黎到竟然落雨,
真係有d想喊. 巴士放低其他人之後載住我地兩個繼續上山, 最後目的地係Moreno 旁邊o既一條小徑. 巴士一路上山o既時候, 忽然間眼前一亮, 我地見到一條彩虹橫跨整條冰川.
冰川至經係唔野少, 仲要加多條彩虹. 仲要條彩虹唔係得半條,而係唔多唔少o岩o岩好跨過成條冰川. 呢個景像真係百年難得一見, 我地搵過d post
card,從來冇一張係有彩虹, 我地都算好彩到極. 第一時間拎部相機出o黎狂影一番.
影得十張八張至捨得行落小徑, 去近距離睇冰川, 捕冰塊跌落o黎.
Moreno 果然同傳聞一樣, 久唔久就 "裂裂"聲, 又久唔久就"隆隆"聲. 我地企o係一個"有利位置"大半個鐘,己經見到幾次大大少少唔同o既冰塊跌落o黎.
唔係下下有聲都代表有野會跌落o黎, 可能只係冰川移動, 令內部其中一d 冰塊裂開. 我地都未必會理會, 但好奇怪, 每次真係有野跌落o黎, 我地都一定會知今次真係有野跌落o黎,
例必見到全部過程. 我地兩個企到差唔多食晏時間, 我見有一舊好大o既冰應該好快會跌落o黎, 所以都仲有d依依不捨, 但經過阿邦三番四次摧促,都係先去食晏.
我地行返去先前買船飛o個度, 大約行o左15分鐘. 叫o左個steak食, 味道同口感都唔錯. 食完午餐, 正徬徨唔知點行返去之際, ticket
office 話我地知o個度有shuttle bus免費送我地去返小徑,返到小徑, 舊大冰己經跌o左落o黎. 唯有再等過另一舊大冰, 等下等下, 等到我部dc
都冇哂電,唯有專心拍我的dv. 好在o係我地臨走前捕到一舊大冰跌落o黎, 可以好滿足咁坐我地巴士離開.
巴士3點半開出, 返到calafate 己經係5點幾, 我地8點幾飛, 下一站cuzco, 但要先經布誼諾斯艾利斯,再轉往利馬, 然後再轉往cuzco.
仲有少少時間, 我地又深知內陸機冇乜野食, 於是先食少少野, 就出發往機場, 離開我心愛o既艾加拉法第.
Mayo
Upsala
認住佢, 千祈咪幫襯!
巨型浮冰
Moreno