2月12日, 一早起身己經鼻水不停流, 又係8點幾機, 又要5點幾起身. 由布誼諾斯艾利斯飛往南端的艾加拉法第(El Calafate). 落機時大約12點, 拿拿聲飛的士去bus terminal. 阿邦好想係呢度用盡d時間, 係咁問各間Agent各式各機Tour o既資料, 我就宿位好擔心會好緊張, 事關而家係呢度o既旺季. 對於阿邦係咁問Tour, 我其實都有少少不耐煩. 不過問過information centre, 仲有好多hostel 有位, 住宿唔成問題, 就安心地跟住阿邦四圍問Tour. 但係因為我不停咁流鼻水, 又係咁咳, 所以我周不時都行開'嗔'鼻涕. 掉垃圾. 所以都冇乜點聽到阿邦問o左D乜. 足足攪o左成粒鐘, 阿邦會報返問o左D乜. 最後我地揀o左第二日去Moreno(莫蘭路)冰川. o黎一個行冰川之旅. 之後o個日坐船去Mayo, Upsala, 和幾個較小型的冰川. 第三日再番煲Moreno. 坐車去冰川底睇D冰跌落水.
我地之所以去咁多次Moreno, 原因係佢係呢度最出名o既冰川, 出名在佢係好少數仲動緊o既冰川, 聽講話佢每日都會向前移兩米, 當然, 當佢移前o既同時亦會跌d 冰落水, 而遊客最想睇o既亦係呢一刻.

定好哂之後, 就去搵地方落腳, 我地行o左去一處都幾近大街o既一間民宿, 可以話係平靚正, 背囊友去Calafate睇冰川. 不妨唸唸呢間. 歇歇之後就去Agent攪我地第二日個Trip. 一行出門口, 我地兩個就聽到羊咩聲, 原來係民宿隔離o個家人養o既羊. 我地兩個o係門外影o左幾張相. 個屋主見我地影佢隻羊, 就拖隻羊過o黎俾我地影, 真係好人到我地有少少唔好意思. 我地又見到佢地個女, 呢個妹妹非常得意, 又多表情, 我同埋阿邦都好鐘意佢. 唔單只同佢影相, 仲同佢玩o左一陣. 佢爸爸見我地同佢玩得咁開心, 仲抱埋佢o個仔出o黎, 不過佢個仔就唔係好肯出o黎, 一路o係度喊.
同妹妹玩完, 繼續去搵o個間Agent. 成個Calafate 只係得一間 Agent有代理行冰川o既Tour. 去到一問之下, 佢地話一定要我地有行山boot同埋保護手套至俾我地參加tour. 行山boot係因為要裝上行冰川雪山專用o既釘架, 手套係因為d冰好鋒利, 冇手套保護會好危險. 個Agent教o左我地去一間專門租呢D用品o既店, 又係只此一間, 有D覺得佢地打籠通. 不過都冇計啦. 冇理由特登買鞋買手套o架嘛. 雖然唔係咁抵, 但係都租住先, 返轉頭book 埋個tour, 就返民宿攤抖一陣. 途中經過超級市場, 我地就買o左包糖, 唸住請隔離個妹妹食.

 

心水推介民宿

可愛小妹妹, 仲有隻羊添!

攤抖完又未夠鐘食飯, 我地就走o左出去行下, 原本想搵返隻羊同埋妹妹, 但係出到去又見唔到佢. 咁我地就向湖邊繼續行. 一路上我地見到好多野. 我地見到一個男仔學緊騎馬, 忽然間好大o既馬蹄聲傳過o黎, 原來有人趕住幾十隻馬, 唔知佢係返緊屋企定係趕緊d 馬去搵草食. 幾十隻馬o係我地身邊飛奔而過, 我同阿邦不約而同都唸起萬保露o既廣告. 對面有家人好得意, 有幾個細路玩, 其中有兩個女仔, 我地一用鏡頭對住佢就會"柄埋", 我地於是冇再理佢地, 但係冇耐之後, 佢兩個又竟然主動走o黎搵我地, 好似想我地跟住地去邊咁. 原來佢見我地係咁影相, 於是帶我地入去佢地屋企影佢地隻馬仔. 起初我以為佢想收錢啦. 點知又唔係, 佢只係好見我地想影相, 我地唸佢地可能覺得佢地自己有d 好野, 想同我地分享. 佢地好努力咁拖隻馬仔過o黎俾我地影. 佢地屋企, 其實都幾大, 起碼都有幾個足球場, 其實佢屋企就係一個牧場. 影完馬仔, 我地俾o左原本唸住俾妹妹o既糖佢地食. 佢地非常開心, 就冇啦啦拎串蒜頭出o黎俾我地影, 又帶我地去睇佢地隻兔仔, 捧隻肥肥o既白貓出o黎, 又帶我地去睇公雞, 睇佢地個後園, 有蘋果, 桃, 梨, 仲有兩隻狗. 我地攪o左佢地咁耐, 驚住佢地唔知又帶d 乜出o黎. 到時更加知點走, 於是就同佢地講bye bye.行多一陣見開始落, 望望隻錶 , 原來己經係夜晚9點. 睇個天色仲以為六點幾. 我地o係大街求其搵o左間餐廳食晚飯, 之後上o左一陣internet就己經係11點, 今日原本唸住抖下, 點知最後都冇抖到.

係咁拎野俾我地影, 佢屋企隻白貓.

美麗小鎮