貅之旅遊世界

2月6日朝早六點幾我地就到o左RIO機場, 只係得o左一班機到o左, 成個機場己經迫滿哂人. 原因係幾百人排隊只係開三個counter, 加上巴西o既入境處o既人做野非常咁慢, 等O左十幾二十分鐘, 條隊至郁得O個少少. 出O左IMMIGRATION, 唸住走得啦, 點知拎完行李又要再排過, 好似話係要抽樣查, 所以又要再排過隊. 千辛萬苦出到機場, 第一件事就係搵酒店. 皆因呢幾日係RIOo既嘉年華, 所以我地驚住好難搵酒店. 係機場o既agent問o左一大輪, 酒店o既價錢比想像中貴好多, 因為嘉年華周圍都搶貴哂, 冇法啦. 結果搵到一間似乎都幾ok o既. 於是我地坐的士去酒店, 途中阿邦同個司機傾傾下, 似乎係個的士佬話間酒店唔係幾好, 佢話幫我地另外去搵過一間. 因為我地唔識葡萄牙文, o個司機幫我地問又真係會好好多, 所以就等佢兜我地去. 最後係Flamingo 搵到間都幾企理o既酒店. check-in o個陣問下問下, 原來我地間hotel有嘉年華o既入場卷可以訂, 不過就貴到飛起, 成一百六十幾美金一張, 相等於千幾蚊港幣. 都係o個句, 冇計, 都要照俾o架啦. 我睇其他人o既遊記, 佢地o黎之前半年就己經訂定入場卷, 我地呢d 即日買即日睇o既, 點有可能唔貴丫.

check-in完都只不過仲係上午, 於是乎我地就去呢度最出名o既耶穌山睇耶穌像. 的士上到半山一個纜車站, 我地就排隊買車票上山啦. 一排就排o左兩個半鐘, 仲要係張票o個班車係個半鐘頭之後. 由到纜車站到上到山, 差唔多用o左我地四個鐘頭. 買飛之後o個個半鐘, 我地走行返落山唸住搵間餐廳食晏. 本來唸住呢度係旅遊景點, 應該會好多地方食野, 點知大約十分鐘都唔見有任何店鋪. 再行多一陣, 我地終於見到一間頗為整潔o既餐廳. 原來o係巴西係興食自助餐, 不過就唔係畫一收費, 而係畫一每克收費. 即係拎完野之後, 磅一磅拎o左幾重o既食物就計幾錢. 又即係話如果一樣重o既話, 一舊雞骨同一塊牛扒都會係一樣價錢, 所以醒目o既我地當然係拎貴野啦. 而呢間餐廳除o左d 攤出o黎o既食物, 亦都有正宗o既巴西燒烤, 只要你行埋去, 話要d 乜, 要幾多, 廚師就會片俾你, 所以我地都食得幾開心. 禽禽青食完就上返山搭纜車上耶穌山. 雖然己經行開o左一個鐘頭, 排隊買票上山o既人依然冇少過.
耶穌山上幾乎可以望到Rio 全景, 原來Rio 都唔係好大. 我地排o左幾個鐘頭之後, 上到o黎都己經係下晝, 個耶穌像背光背到應一應, 所以如果要去影耶穌像, 最好就係一朝早就o黎排隊. 咁至可以趕及係上午上到山, 影到正光o既耶穌像. 山上面o既地方唔係好大, 但人就非常多. 所以只係逗留o左大約半個鐘頭, 就排隊落返去.

2月7日, 尋晚睇嘉年華睇到三更半夜, 所以到起身己經係十一點. 雖然烈日當空, 但時間緊逼, 都照樣要去遊一遊一d 非去不可o既景點. 我地先去糖包山, 下晝再去 Copacabana 沙灘. 經過耶穌山一役, 我同阿邦都成為驚弓之鳥, 未去之前己經唸定如果又係咁多人點算. 點知去到竟然得o個幾十人排隊, 我地買完票, 就即係可以上吊車, 等都唔駛等. 同耶穌山可謂天淵之別. 糖包山以外型o黎計, 其實都算幾特別. 不過可能因為我地兩個都見過唔少大山, 所以糖包山實在引唔起我地興趣, 只係隨隨便便咁遊下, 坐下吊車就走. 反而另一個景點Copacabana, 我地就寄予厚望.

o係Rio, 酒店最貴係係Copacabana 呢一區, 由此可見佢真係Rio 一個非到不可地方. 我地去到o既時候, 正係太陽依然非常猛烈. 我地都唔理得咁, 一於行去海邊. 起碼多d 野睇, 又有海風. 呢個沙灘o既沙非常幼同埋鬆軟, 而且仲非常大, 比起泰國布吉島的巴東沙灘仲要大好多. 呢度d 浪好大, 游水就唔係幾適合, 況且呢個沙灘大大話話都有幾千人o係度, 要遊水都冇乜幾多位游, 所以多數人都係曬太陽同埋玩浪. 我唸沙灘太大, 救生員要救人都幾麻煩, 所以周不時有直升機飛o黎飛去. 本來我都有少少擔心, 帶住部相機四圍行會引起人誤會, 點知呢度d 人不知幾咁鐘意上鏡, 有時佢地會主動叫我地幫佢地影相, 佢地開心時我地又開心. 我地行o左大約半過鐘頭, 阿邦己經忍唔住話要落水玩. 經過一輪商議, 覺得時間都仲夠, 所以我地就去o左買泳褲. 不過因為買唔到d cheap到震o既泳褲, 所以我地最後都冇買. 返到酒店放低所有值錢物品同埋passport, 換條波褲就返去Copacabana. 我地乜都冇帶, 只係每人帶o左少少錢. 因為要落水, 又冇人看住d 野, 所以連passport都唔帶. 我地搵o左好耐都冇 locker, 附近o既酒店亦冇呢種服務, 為o左唔整濕d 錢, 我地用o左d 密實袋入住d 錢, 再放入褲袋, 除o左對鞋就沖落水. 我地再返o黎Copacabana己經係差唔多五點, 所以己經少o左好多人, 海入面基本上都唔唔算逼, 可以玩得好開懷. o黎到d 咁大浪o既海灘, 當然係玩沖浪啦. 一個浪沖埋o黎, 矮o既都去到條頸. 有時有d 浪高過自己, 我地就跳起, 任由d 浪沖我地埋岸邊. 試過最利害一次, 俾d 浪沖走o左差唔多十米. 一個浪打埋o黎張我沖o左落水底, 我一直都合埋眼, 到再次打開雙眼o既時候, 咦? 我係邊呀? 搵返失散o左o既阿邦, 望返去之前我地被沖走o既位置. 感覺真係好神奇. 我地兩個玩到海水開始有d凍就唔玩. 望一望d 錢, 濕哂. 我地又冇毛巾, 又冇紙巾. 醒目o既我地就搵間大酒店, 趁人多o既時候入去, 去佢地o既廁所, 唸住用乾手機吹乾d 錢, 點知間酒店冇乾手機, 唯有拎佢地幾張乾手紙巾. 發現原來都幾有效. 搭的士返酒店o個陣, 差乎係俾張乾o既銀紙個司機.
夜晚我地出去食晚餐, 又係磅野食. 街上面有車播音樂巡遊, 我地兩個睇o左一陣, 因為第二朝早走, 所以都唔想玩得太夜, 就返酒店訓. 絕對要講一講間酒店, 收得貴不在話下啦. 仲要個冷氣開到凍一凍, 又吹到我正一正, 又冇哂d 按扭冇得調較, 仲要d 扇葉冇咁一大截, 想轉個方向都唔得. 結果俾佢吹得兩日, 加埋夜訓早起, 又曬又濕水, 結果第二日就傷風, 南美玩咁多日就病足咁多日.
Rio 只係停留兩日, 雖然時間好短, 但冇辦法, 因為我地仲有好多偉大o既景點要去. 大約朝早六點, 就動身去機場, 飛去全球最大o既瀑布伊瓜蘇瀑布.

返到酒店, 拎o左我地兩張嘉年華入場卷, 出去town 買o左兩件老翻o既巴西國家波衫, 沖完涼, 換完衫, 大約七點我地就出發去嘉年華會場.
一般人都會以為巴西的嘉年華是在街上舉行, 但其實雖然街上o既人都會狂歌起舞興祝, 某d大街上偶然都會有d 十零人至幾十人o既隊伍巡行. 但其實真正o既嘉年華係o係一個會場舉行, 一連四日, 每日會有十五至二十個隊伍比賽. 而每隊有千幾人(甚至幾千人.. 因人太多數唔清)同埋十幾二十部花車. 每隊一路表演一路行過會場都要成個鐘頭. 成十幾二十隊, 大家都可以計到要攪幾耐啦. 嘉年華夜晚9點正式開始, 我同阿邦睇o左四五隊, 去到零晨二點幾己經頂唔住要返酒店, 會場入面仲有好多人唔捨得走. 到我地第二朝差唔多十一點睇電視, 見到竟然都仲進行緊, 由天黑玩到天光, 而會場入面仲有六七成人都仲未走, 巴西人認真利害.
講開觀眾, 巴西嘉年華o既觀眾, 我開頭以為多數係為o左去睇表演啦, 點知原來唔係, 原來係咁貴買張飛, 係為o左一齊跳. 只要音樂一起, 全場o既觀眾就會好似發o左癲咁一齊跳. 坐o係我地隔幾個位有個人, 個身型同埋個樣一睇就知佢係一個巴西人, 仲要係踢波o個隻, 十足十羅馬里奧咁樣, 我幫佢起o左個名叫十號仔. 呢個十號仔, 久唔久就會興起, 係我地面前表演佢出色o既森巴舞. 每次十號仔表演o既時候, 企佢側邊o既人都會讓開, 睇佢表演. 只見佢上身唔郁, 但屁股同埋對腳就以極快o既速度扭. 雖然佢肥o都o都, 肚腩大, 但係佢身上, 我地見到乜野為之正宗o既森巴舞, 睇到我同阿邦都目定口呆. 又証明o左無論係乜型, 都一樣可以跳森巴舞.