拉斯維加斯之旅﹐係全程入面最麻煩o既一段﹐原因係我地全程o既MOTEL 都係WALK-IN﹐事先都冇唸過會去邊間MOTEL。但如果係拉斯維加斯就唔係幾行得通。因為拉維加斯基本上就一大堆o既酒店﹐各有特色。所有SHOW﹐賭場﹐全部都o係酒店入面﹐要住D有特色o既酒店﹐唔BOOK定就未必會有房。而且如果唔係三更半夜WALK-IN﹐WALK-IN 個價錢係會比BOOKo既價錢貴好多。基於以上原因﹐我o係未出發去美國之前一個星期﹐已經BOOK好哂酒店。不過BOOK定又有BOOK定煩﹐因為唔可以臨時轉酒店﹐退房又麻鬼煩。
拉斯維加斯入面最有特色o既酒店﹐基本上都係集中o係一條街上﹐所以行完條MAIN STREET﹐就可以算行勻哂成個拉斯維加斯。
由於又要穿州過省﹐我地去到LAS VAGES時已經係四點幾五點。我地安頓好之後﹐阿蔡話帶我地去食LAS VEGAS最出名o既BUFFET﹐一間叫RIO o既酒店。呢餐絕對唔係我有生以來食得最貴o既一餐﹐但絕對係有生以來最正o既一餐。大約四十蚊美金﹐3百零港紙﹐香港叫做好D o既Buffet﹐都要呢個價錢啦。龍蝦-我食o左起碼3,4隻﹐阿拉斯加蟹又有兩三隻﹐仲有自選o既海鮮同自選調味材料﹐廚師即場泡製。我非常欣賞我自己揀o既調味材料﹐帶出海鮮鮮味之餘又帶點野味﹐總之就未食過咁好味啦。平時一家人至食一隻o既龍蝦﹐我地每人都食o左三四隻。一個人食四家人o既食量。食到後來﹐我要出去行下抖抖﹐然後至有餘力再食過。到我第二次出去行時﹐己經係聞到龍蝦'朕'味都頂唔順﹐有D想嘔想嘔o既感覺。食埋無敵o既甜品﹐我辛辛苦苦o係大峽谷所減o既磅﹐就此付諸流水...。
夜晚--先至係行拉斯維加斯o既時候﹐因為LAS VEGAS其實就o係正沙漠o既中間﹐日頭曬到不得了。而且﹐LAS VEGAS 出o左名係不夜天﹐係燈光映照之下﹐酒店'PARIS'o既鐵塔同凱璇門更加靚﹐'LUXER'o既獅身人面像更加神秘﹐'凱撒皇宮'更加有氣派。行街逛商場雖然都唔係我地幾個o既喜好﹐但一場o黎到﹐一定要行一行D咁有特色o既商場。'NEW YORK NEW YORK'o個個商場旁邊有好多紐約o既小屋﹔'阿拉丁'個商場久唔久就會成個天空都黑哂﹐仲會行雷落雨。'凱撒皇宮'o個個入面有間玩具鋪﹐成間鋪頭就係'木馬屠城記'o個隻木馬。好過癮﹗朱錦同阿蔡都o係隻木馬入面買o左隻 高達 GP01。佢地話好抵o架喎。再夜D朱錦同PATRICK o係唔知邊間酒店度聽 LIVE BAND﹐我同阿蔡都冇乜興趣﹐所以上房休息先。之後佢地有冇去邊﹐就不得而知啦。
o黎到賭城﹐點都要入一入賭場見識下﹐不過我地幾個'Cheap王之王'梗係唔會去賭啦﹐我用o左兩蚊美金﹐同隻老虎機搏鬥o左成半粒鐘。結過我因為運氣欠佳而落敗。我估佢地幾個o既戰績都同我差唔多掛。

當晨光初露﹐七點o既時分﹐阿蔡同我就要踏上歸途。當我地打開門正要離開之際﹐半夜三四點至返o既朱錦忽然打開雙眼﹐講o左一句"再見啦﹐兄弟"
故事並未就此完結﹐因為我暫時返唔到香港。本來係有好多位剩o既班機﹐唔知係咪因為載太多貨﹐唔俾我地呢D WAIT LIST o既人上機﹐無可奈何﹐又要係同一個機場逗留好多個沉悶o既鐘頭。因為有上次打電話o既經驗﹐所以今次打電話俾大文o既時候﹐冇上次咁多問題﹐ 好快就搵到佢。o係等大文o既期間﹐我o係LA 機場o既一間PUB度睇NBA決賽﹐ LA LAKER 對費城 SIXER。所以特別好氣氛﹐起初o係我旁邊一齊睇o既﹐只有幾個"實Q"﹐到比賽尾段時﹐我望望身邊﹐大大話話都有成百人一齊。我當然係捧 LA 啦﹐在場o既幾十人﹐我估十居其九都係同我一樣捧LA﹐因為我地身處o既係LA機場嘛。每次LA入波﹐身邊o既
黑鬼就會'YES﹗''WOW﹗'。我咁耐都未試過睇NBA睇到咁肉緊。其實當時都有D驚﹐ 驚有D攪事分子唔生性﹐SIXER入波就撩慶班LA 黑鬼。到時殺錯良民就真係死得無辜啦。
我由朝早11點幾等到夜晚八點幾至等到大文。好在有得睇NBA﹐唔係都幾難捱。一見到大文之後﹐我第一件事就係叫佢帶我出去食野﹐我唔想再食麥當勞﹗我真係唔想再食AMERICAN STYLE o既食物。包﹐沙律﹐我真係見到就驚。大文帶o左我去一間餐廳鋸扒﹐仲要係佢請我...真係感動得好緊要。o個晚﹐大文招呼我去佢屋企訓﹐雖然只係訓'沙發'但唔駛訓機場我已經好滿足。第二朝早﹐大文媽媽一早就煮好早餐﹐雖然佢叫我食先﹐但大文仲未起身﹐我自己食先好似唔係咁好﹐佢見我遲遲唔食﹐以為D野唔o岩我食。
問我平日多數食乜早餐﹐我以為佢就咁問下﹐就答佢話我平時多數都係一件旦治。估唔都佢走入廚房﹐幫我整o左件旦治出o黎。我見到咁﹐都唔好意思再推。就先食為敬。件旦治冇乜特別﹐但我係美國每朝唔係麥當勞就係JACK IN THE BOX﹐所以當時我真係覺得件旦治真係美味到不得了﹐從來未食過咁好未o既旦治。大文話佢住LA咁耐﹐都佢阿媽都未整過旦治俾佢食。佢一家人對我﹐真係唔話得。

再一次踏入LA 機場﹐終於都可以走啦﹐故事亦就此完結。 在此祝福o係美國住o既大文一家﹐ 阿蔡同埋朱錦。