貅遊世界

經過一晚休息﹐攝製隊就離開大峽谷﹐去另外一個國家公園。聽看守大峽谷閘口o既工作人員講﹐全個阿里桑拿州總共有29個國家公園。其實攝製隊一行人都唔係好知將要去邊﹐全部人之中只有朱錦知道﹐皆因我地全部o既行程都係佢由PLAN出o黎。而佢淨係話俾我地知"o個度"有個好大好正o既湖o架。不過其實就算佢話俾我地知"o個度"係邊度﹐我地都唔識。不過從地圖得知﹐"o個個湖"叫 POWELL。
我地沿住大峽谷o既desert view road行﹐講你都唔信﹐因為DESERT VIEW 見到o既竟然唔係沙漠﹐反而係一個一望無際o既森林。大峽谷入面草都冇條﹐估唔到旁邊竟然係森林。
數小時之後﹐我地終到達Powell﹐o係我地面前出現o既﹐除o左係Powell湖之外﹐仲有一個超級水霸。水霸旁邊有個information centre﹐我地O係入面搵到關於個水霸o既資料。如果我冇記錯﹐Powell水霸有成六百幾尺高﹐同著名o既HOVER DAM 只係相差幾尺。全國排列五名之內(好似排第三). o係information centre﹐我地唔只睇到有關Powell水霸o既資料﹐仲問到原來O係POWELL游水﹐係冇人會理你﹐只要係可以落水o既地方﹐你都可以走落去游水。附近仲有TOUR可以坐船遊覽Powell o既風光﹐亦可以租船自己玩。由於我地去到o既時候己經4點﹐Ferry Tour己經走o左﹐要坐都要等第二日﹐而且價錢亦頗貴﹐ 所以我地都"渣"唔定主意。一輪o既商討同資料搜集之後﹐我地決定第二日一早就去租船。結果o個晚﹐我地幾個麻甩佬﹐o係Powell o既某一角落一齊睇日落。所謂一早﹐其實都成十點﹐因為咁多種租船o既Package之中﹐最抵o既係十點至五點o個隻﹐而且o岩哂我地起身o既時間﹐今次我地好醒目﹐之前己經買好哂水同埋食物﹐因為o係湖入面﹐係絕對搵唔到野食。BOOK船o既時候﹐我地問要唔要D乜乜執照﹐物物Trainning﹐佢地話唔駛﹐開船之前會有個Briefing﹐就係咁多。我地都覺得好奇怪﹐乜都唔駛﹐咪好危險﹖﹗到實際上船之前﹐Briefing o既時候﹐佢教我地點樣開船﹐停船。其實真係好簡單﹐五至十分鐘咁上下﹐ 我地己經掌握到所有精髓﹐可以開船出發。

我地o既第一屆船長係阿蔡﹐不過佢'渣'o左冇耐之後﹐又開始流鼻血﹐今次流得仲勁過上次﹐不停係咁流﹐點樣都止唔到血。我地內心輪交戰之後﹐決定搵人陪佢去買藥。船慢慢泊岸﹐阿蔡流鼻血o既情況好似又靜o左落o黎。佢自己一個上o左岸﹐話自己渣車去就得啦﹐唔駛人陪。我地見佢似乎都冇再流血﹐只好好似好冇人情味咁目送佢遠去。
阿蔡走o左之後﹐我地再一次踏上征途。今次我地要遠征o既地方叫 Rainbow Bridge。係一條全世界最大o既天然形成石橋。船出o左碼頭之後﹐我地馬上加速﹐'爸'o既一聲﹐船頭昂起﹐我地都嚇o左一跳﹐原來架船竟然可以咁快﹐我地以時速大約四十海里行駛﹐大約等五十幾六十公里。

Powell (鮑威爾湖) 望落去十足十1個俾水浸o左既大峽谷。山勢大同小異﹐只不過下面就多好多水。我地今次帶哂足夠食水食物﹐我以為今次都算係夠準備啦卦﹐點知都係棋差一著。原來渣船唔同行路渣車﹐有路可以跟﹐有跡可以尋。我地上到船﹐連東南西北都唔知係邊﹐望落去四面都係一樣﹐左邊係地圖o既邊一忽﹐右邊係地圖o既邊一度﹐根本唔會知道﹐因為個湖實在係太大﹐我地根本唔知遠處o既石係突出o黎定係凹入去﹐以為前面係冇路﹐偏偏去到盡頭﹐又會有路俾你屈入去﹐所以肉眼根本唔可以判斷我地身處何方﹐應往何處。不過湖上要原來都有航道﹐係主要航道上都有浮標﹐但係我地因為慳o既原固﹐冇買到有浮標位置o既地圖﹐只係o係Information Centre 拎o左張免費o既地圖。加上我地冇買指南針﹐完全唔知自己應該點行﹐不過我地租船時o個度D人都同我地講過下要行邊條航道﹐要留意邊幾個Number o既浮標。如果唔係真係成世都未必去到。(冇作大)。搵o左成個鐘﹐我地至開始搵o岩條路去Rainbow Bridge﹐一路上我地繼續Keep住四五十海里咁行﹐偶然都會有其他船o係附近行過﹐濺起一D大浪﹐我地駛船迎浪衝去﹐破浪之後成架船飛起﹐再跌返落o黎o個下﹐'Wooh!'真係好有FEEL﹗

我地去到三點咁上下至到Rainbow Bridge﹐o個度真係隱閉得好緊要﹐大有以前卡通片入面D秘密基地o既感覺。雖然大費周章﹐大係Rainbow Bridge都係一處值得一去o既地方﹐反而咁樣搵下搵下﹐仲好過漫無目的咁遊船河。回程o既時候﹐我地己經可以搵得返回程o既路﹐唔似o黎o既時候成日走錯路。所以個幾鐘頭己經返到碼頭。我地同阿蔡Say Good Bye o既時候﹐已經約好o左五點o係番碼頭等﹐我地大家都非常準時。之後當然係返Motel啦﹐回程o既時候﹐阿蔡講返佢去o左邊﹐原來佢之後又流血不止﹐自己去o左醫院﹐醫生都幫唔到佢止血﹐最後要枝個燒紅o左o既鐵捧﹐插入去鼻入面﹐'辣'到入面結焦至止到血。咦~﹗我聽到都驚。

由於阿蔡爆血管﹐我地最後留o左o係Powell 三晚咁多。不過Powell都算係一處幾靚o既地方﹐住三晚我地都覺得冇o徒時間。
請留意下集大結局 (拉斯維加斯)