貅之旅遊世界

一早起身食早餐, 又去搵酒店, 皆因阿邦覺得間酒店麻麻地, 應該會有更加平o既。於是乎我地走o左兩條街, 搵到間只係70 pesos o既酒店, 叫Astrola Hotel. 都算係平靚正。但係到我地攪好手續, 都己經十點幾, 所以要快d返去之前間酒店check-out。返到酒店, 好在都o岩o岩好趕得切。今日算係最他條o既一日, 因為布誼諾斯艾利斯雖然靚, 但係就冇d一定要去o既景點, 我地其實可以逛下街。不過我地仲有五六程飛機o既機票未訂到, 時間緊迫, 我地都係要快d攪掂d機票。所以我地搵酒店時都不忙搵travel agent 同埋航空公司o既office。途中我地只係搵到一千零一間Travel Agent, 梗係捉住唔放問長問短啦。我地剩低o個幾程飛機o既schedule 都唔錯, 基本上夾到我地個行程。總算叫做放心d。不過慬慎d, 都係唸唸至決定。返酒店放低行李之後, 我地就去睇下航空公司。我地想搵秘魯航空, 點知原來佢係十萬九千里遠, 中途阿邦係咁俾蚊針。原來秘魯航空(Lan Peru)同智利航空(Lan Chili)係同一間公司, 所以d機可以駁得更好, 價錢俾之前個Agent更抵 (之後個agent 係用阿根廷航空o既機), 仲買多兩程由利馬去庫斯科(Cuzco)o既來回機票。計計下, 原來自己淨係南美己經要坐八程飛機, 用o左成九百幾美金。之後我地又返返去個Agent度, 因為搵佢訂埋由o個度返布誼諾斯艾利斯o既機, 同埋下一站加拉去第(El Calafate)o既酒店, 因為聽講而家係o個度o既旺季, 驚住冇位, 所以訂定先。行到半路, 我地又遇見另一間Agent, 佢地話o個程機己經冇哂位, 真係俾佢嚇到鼻哥窿都冇肉。我地即時改變計劃去阿根廷航空問, 不單有位, 而且價錢都係一樣, 於是乎梗係即買啦。機票攪掂, 剩低酒店未問, 點知個agent話要我地join package, 仲貴到嘔。根據我地o係伊瓜蘇o既經驗, 呢d package略水唔駛本, 所以我地就唔理佢, 唸住到步至搵酒店。攪好哂d野, 我地就去搵tourism centre幫我地book位今晚睇Tango 表演, 然後返酒店攤抖。因為我己經病到死死下, 撲o黎撲去搵酒店搵機票己經累唔係好頂得住。

訓o左幾粒鐘, 七點九阿邦叫醒我一齊坐的士去一間叫Michelangelo好高格調o既餐廳食晚飯兼睇Tango, 門口一早就有個部長咁上下o既阿伯招呼我地, 佢話訂位時tourism centre 己經叫佢特別照顧我地, 所以佢非常咁好招呼, 仲安排長4號?俾我地, 係最前排, 睇表演時可以冇視線阻隔。表演未開始係樓下等入坐, 所有人都係樓下吹水, 紅酒, 白酒都任飲, 不過當然就唔係d貴野啦。我地係咁二飲o左幾杯, 但就不停咁影相, 好有Mood, 好正。入坐之後又有個全場至靚女o既待應姐姐(Malisa)招呼我地, 英文好Talk得, 唔駛下下西班牙語, 雞同鴨講。
Tango表演好正, 我左手DV, 右手DC, 鏡頭追住d人, 見有定鏡就影相。原本以為個show只係一個鐘頭咁上下, 點知最後去到差唔多十二點至散場。

2月11日, 第二個唔駛早過七點起身o既朝早, 今日我地唸住去La Boca, 不但係小保加足球隊o既基地, 亦係Tango Music發源地。我地走到五月廣場搵巴士, 點知搵極都搵唔到, D巴士又飛站, 等到把幾火就決定直接行去。點知原來我地睇錯地圖, 行極到去唔到, 反而去o左Sam tempo, 王家衛都曾經o係度取景拍春光乍洩, 見o黎到啦, 就順便行下啦。行o左一陣, 忽然間落雨, 避避下雨o既時候有個阿婆同我地傾o左幾句, 我地就順便問阿婆點去La Boca, 佢教我地上乜車, 邊度上。好在見到阿婆, 如果唔係又要坐的士啦。去到La Boca, 我地又見到人街頭表演Tango, 我見佢地同尋晚o既表演差咁遠, 冇理佢地就行開自己影相, 阿邦仲係咁補住佢地, 表演完俾就俾人問佢拎o左兩蚊, 我就一早撇o左, 冇事。
La Boca係一個碼頭區, 特別之處就係有好多顏色鮮艷o既小屋, 我地o係呢度影完相, 買完手信, 就返市中心去据扒。

我地想臨走前係阿根廷現場睇一場足球, 同埋食餐好o既牛扒。於是乎就搵o左間都幾出名o既扒房, 叫Las Nazarenas。我地唸住食豪d, 所以就叫o左個全瑒第二貴(60pesos), 另外加一個cheap cheap 地o既(16pesos), 到差唔多上菜, 我地至發現原來個menu 有寫每份牛扒有幾重, 而我地o個個貴人一倍o既牛扒, 原來係因為重人地一倍, 足足有1.2kg, 塊牛扒粗過我大脾, 成四cm厚, 隔離幾台o既食客見到我地都為之嘩然。最慘就係佢係T骨扒, 近住舊骨附近o既肉都仲血淋淋, 食唔落, 食得o既反而仲少過另外一件, 不過食得o個d肉o既肉質又確係好do既。
食完牛扒, 己經天黑, 我地一早問o左tourism centre邊度有波睇。佢地話今日係球季第一場係Racing對Argentino。我地又問過佢地, hotel reception, 同埋的士司機,, 大家都話係Racing主場, 於是乎就飛的去啦。點知去到烏燈黑火至知攪錯哂, 原來係Argentino主場至真。現場睇唔成, 唯有返酒店睇電視啦。的士返酒店中途, 仲係球場o個區o既其中一個燈位, 有人半路截劫。的士司機拿拿聲幫我地lock住窗lock門, 然個攪開自己個窗同佢地傾。好在又冇乜事, 但隔離部私家車就俾人夾梗洗車, 問司機收錢。返到酒店, 其實都己經好累, 未睇完電視直播己經訓著o左, 好在冇入到場, 唔係未睇完訓o左就蝕底啦。